معايا سند ..معايا سند

الحكومة بتفكر توزع سندات الشركات المملوكة للدولة
وعددهم 96 شركة من أصل153 على 41 مليون مواطن سنهم اكبر من 21 سنة
بواقع 3 سندات لكل فرد سند فى شركة جيدة وسنده فى شركه جيدة جدا وسند فى شركة ممتازة

********
أخيرا سمعت اسمي فى التلفزيون فى حفل توزيع سندات الشركات المملوكة للدولة
على المواطنين و اللى قام بتقديمه بطلى المسلسل التركى (نور و مهند) ...و رغم انى
دعيت كتير إن اسمي يقع فى ايد نور ...لكن المنحوس منحوس ..وقع فى ايد مهند
..وقال إن سنداتي وقعت فى شركات (حلوه يا بلدى ) و ( اللى خدته القرعه ) و ( حمرا يـا قوطه) ..
..و اللى يدقق يلاقى ان سنداتى وقعت فى شركة خربانه وشركة مخروبة
وشركة بتتخرب ..تمام زى كل أهل مدينتى الغلابة اللى ملهومش ضهر يسندهم ..بالرغم
من إنهم قالوا إن التوزيع للشركات حيكون عادل .. بس تقريبا عادل مات
خرجت أتمشى قابلت ابن عبد ربه ..قالى : شوفت عملوا ايه؟....
.قولت له : خير ؟؟ فيه ايه؟....قال : قالوا ان الاختيار حيكون على الملأ
فى التلفزيون بس رجعوا فى كلامهم فى أخر لحظة و خلوه عن عن طريق
الاختيار العشوائى بالكمبيوتر.....بس إيه بقى .. أخوك كان عامل حسابه ...كنت مظبط
مع عضو مجلس الشعب بتاعنا و اللى بصراحه عطانى 3 شركات
زى الفل ....قلت له : طيب إيه العمل؟؟...قال لى : روح له و قول له يغير شركتك
....رحت للنائب ..قال لى... مجتش بدرى ليه ؟ خلاص اسمك طلع فى التلفزيون
و بكره حينزل فى الجرايد.....روحت البيت مهموم وفتحت التلفزيون
على قناة * البيض بيضك* لقيت السفيرة سميرة الحطاب بتقول
ان السندات سوف تزيد من معدل الطلاق لأن الزوج سيفتعل المشاكل مع زوجته المسالمه
و التى ازدادت وداعتها بعد حصوله على السند و سيتزوج عليها و سيكون السند
هو السبب فى خراب البيوت...و لكن المذيع عارضها قائلا: ان هذه السندات
سوف تقرب بين الزوجين اكثر لان كل منهما سيرغب فى سندات الأخر..
غيرت القناة لقيت اعلان عن برنامج جديد ل طارق علام اسمه ( كلام من سند ) بيقول :
سند سند سند
كان الكلام من فضة...دلوقتى أصبح سند
جاوب معانا اليوم دا ..حتلاقى عجب العجب
جاوب حتكسب ..سند سند
من غير ما تتعب ..سند سند
أصل الإجابة تسوى السند
جبت قناة (أم السعد) الفضائية لاقيت شيخ بيقول أنه يجوز بيع السندات
لأجانب باعتبار إن بيننا وبينهم هدنه و يجوز التعامل معهم و البيع لهم طالما عرضهم هو الأحسن للفرد
جبت قناة (اكتب ) الفضائية : لاقيت شيخ بيفتى بعدم جواز بيع السندات لأجانب...أنا بصراحة اتلخبطت...
غيرت القناة لاقيت مسرحية مدرسة المشاغبين وعادل إمام بيقول : الناس حتقطع بعض يا أبو حميد

*******
دخلت عالنت على موقع ال (نوز بوك) لاقيت ناس بعتالى دعوات

انضمام لجروب اسمها ( بيع سندك بيع سهمك شوف الشارى مين ) و حاطين

فيديو لمفتى الجمهورية بيقول فيه إن احنا ممكن نبيع لأى حد عادى ...و طالبيين

مننا نسيب اسم الشركات اللى عندنا اسهم فيها و هما حيبعتوا لنا لو لاقوا عرض لها .

. و سعر السند تحفه من 5000 الى 10000 جنيه رغم انه فى الحقيقة ما يجبش 2000جنية
و لاقيت جروب كمان اسمه( أنا مش عواد ) بيطالبنا بعدم البيع وحاطط فيديو لمفتى

الجمهورية برضو بس المرادى المفتى بيجرم البيع للأجانب!!!!!

******
نزلت أقعد ع القهوة ، قابلت ميدو صاحب القهوة سلم عليا وهو بيتفرج

على قناة (مولتى ) اللى كانت مشغله أغنية المطرب حمامه بلال و هو بيعيط

و يقول : دى عيلة واطية ونصابة بسنداتى أنا عملوا جوازه و بعين يصرخ

ويقول: هاتوا السندات اللى عليكوا ....و شوية و جه ميدو قعد جنبى

و قالى : عرفت ليه بقى حيوزعوا سندات 96 شركة بس من أصل

153 تمتلكها الدولة؟؟ بيقولك ان دى الشركات الخسرانة و الشركات التانية

هى الكسبانة و حيوزعوها على نفسهم بعدين، و بيقولك كمان.................

.. قطعت كلامه وقلت له: هو مين اللى بيقولى ..هو يعرفنى منين علشان يقول لى؟؟ وليه يقولى أصلا؟

******
روحت البيت زهقان ودخلت انام ..و أنا نايم حلمت انى دخلت مغارة الأربعين حرامى

و لاقيت فيها أوراق كتير ..دققت فيها وقلت : شيكات .أسهم . سندات....

.أحمدك يارب ... و بعد ما خلصت أخر حرف طلع عليا الأربعين حرامى

شاهرين سيوفهم فى وشى وهم بيرقصواا و بيقولوا :على بابا بعد الضنا لقى

سندات كتير ...باعها وقبض تمنها وبناله قصر كبير .. والست مرجانه طول يومها

نشوانه والفرح طول الليل..

******
صحيت تانى يوم بدرى علشان أجيب أوراق ملكية سنداتى و وقفت فى طابور طويل

و الناس كانت واقفه فيه مبسوطه جدا وبتهتف و تقول : ارمى سنداتك عليا .

.و أنا أشيل عنك شويه .. أه يا مصر يا أغلى عندى ..من كل الدنيا ديه
المهم أخدتهم و رحت أزور أخويا ..لاقيت عنده جرنال النهارده ..ولاقيت عناوين شدتنى:
***رئيس البنك المركزى يقترح وضع علامة مائية على السندات منعا للتزوير
***المشردون و أطفال الشوارع الأكبر من 21 عاما وليس لديهم ما يثبت إنهم مصريين

..هل سيكون لديهم نصيب؟
***مشكلة حسنى المنحوس: عمره لحظة توزيع السندات 21عاما الا يوم
***لماذا لا يتم توزيع السندات على العائلات التى تمتلك بطاقات تموينيه ضمانا

لوصول السندات لمستحقيها
*** مسئول مصرى يقول : قيمة السند لن تتجاوز 1500 جنية بأى حال

من الأحوال عند محاولة بيعها
*** هل سيكون لرئيس الجمهورية و أسرته نصيبا فى الأسهم ؟ وهل سيتبرع بها كما فعل

مع جائزه نهرو الهندية؟؟
*** مقطع فيديو تأنيب الراحل عبد المنعم مدبولى ل هاني رمزى فى فيلم عايز حقى

من أكثر الفيديوهات زيارة وتحميلا على موقع ( يو آر تيوب)...و وزير الإعلام

يؤكد أن الفن يلعب دورا كبيرا فى تغيير الشعوب
***ارتفاع شعبية هانى رمزى و الجماهير تطالبه بعمل فيلم سياسى أخر

لربما تنفذه الحومة مثلما فعلت مع فيلم _عايز حقى_ و قد أعلن هانى رمزى

على قناته الفضائية التى تتلقى ألاف رسائل ال اس ام اس يوميا أنه يعكف

الأن على فيلم تتلخص فكرته فى توزيع شوارع الجمهورية الرئيسيةعلى

المواطنين بواقع 10 الى 100 متر لكل مواطن و للمواطن الحق فى أخذ الضرائب

من السيارت التى تمر فى ملكه ..و كل هذا فى اطار كوميدى ساخر
بعدت الجريدة عنى و استأذنت للخروج لأن فيه صداع رهيب جالى ...نزلت الشارع

لاقيت راجل معلق زينه قدام بيته و بيرقص وهو ماسك السندات و أصحابه

و اللى حواليه بيصفقوا له ويغنوا له:
شيخ البلد ..جاله سند..من فرحته ..قلبه انشرح ..عامل فرح
شاورت لتاكسى علشان ياخدنى البيت و ياريتنى ما ركبت معاه لأنى لاقيته مشغل اغنيه بتقول
السند السند السند....السند يا خويا السند....يطلع فى شتا أو صيف
و أنا فى طريقى للبيت ....عديت على المسجد ...طلعت السندات من جيبى

وحطيتها فى صندوق التبرعات ....
حسيت براحه جميلة....صحيح الباب اللى يجيلك منه الريح سده واستريح

عودة الى الحضانة

بالصدفة وقع فى يدى كتاب للأطفال
من النوع اللى فيه قصص مصورة
و الطفل بعد ما يقرا القصة يلون الصورة
و لكن الكتاب ده مكنش فيه قصص مصورة

انما كان فيه سلوكيات و أفعال مصورة
لاقيت ان فيه ناس فينا محتاجه تعرفها أكثر من الطفل
أيوه ..محتاجينها
مش بس علشان يعلموها لأولادهم
لأ ..دول محتاجينها ليهم شخصيا
علشان هى سلوكيات مش عندهم
و أدى شويه أمثله لسلوكيات كانت بتناقشها الصور
اللى معلش مش حأعرف أرفعها
*لا أجلس مع المدخنين أبدا
*اساعد جارى ان كان محتاجا
*لا أرفع صوت المذياع حتى لا أزعج جيرانى
*احافظ على المرافق العامة ولا أقوم باتلافها
*لا القى القمامة من النافذة
*أصعد لمن أزوره ولا أنادى عليه من الشارع
*أساعد المحتاج فأدفع معه سيارته
*احترم الكبير عندما أتحدث له فلا أرفع صوتى ولا أضع يدى فى جيبى ولا اشيح فى وجهه
*أرد الى البائع المال الزائد ولا أخذه
*أنصر الضعيف و ادافع عنه
*اساعد امى فى تحضير الطعام
*لا آكل من الباعة المتجولين أبدا
*لا أشير لأحد بحديدة ولا سكينه وان كنت مازحا
*أدخل الحمام برجلى اليسرى و أقول دعاء الدخول
*لا اعاكس أحدا فى التليفون
*أقف فى الشرفة بملابسى ولا أعاكس أحدا
*أزور أقاربى و أصل رحمى
*أحترم معلمى و أستمع اليه واذا أردت سؤاله أرفع يدى بأدب
*لا أصاحب المفسد
*لا أرفع صوتى على أمى
*حيائى يمنعنى أن أكل فى الطريق العام
*لا التفت يمينا ويسارا و انا اصلى
*أجلس فى هدوء واعتدال أمام الاخرين
*لا أتكىء ولا أنام أمام الأخرين

ياترى كم شخص حوالينا محتاج يرجع تانى الحضانة
علشان يتعلم سلوكيات لسه ما اتعلمهاش
مع ان أطفال الحضانة عارفينها و بينفذوها
؟؟؟؟؟؟؟؟؟؟؟؟؟؟

أنا و مدربين التنمية البشرية

التنمية البشرية..مصطلح أصبح موجود بقوة فى وقتنا الحالى
و بالرغم من انه علم جميل ومفيد الا انه حاليا أصبح تجارة
ووسيلة سهلة لكسب الشهرة و النقود فى وقت واحد
فكل ما تحتاجه لتصبح مدربا للتنمية البشرية
هو ان تكون متحدث لبق لديك قدرة جيده على الاقناع
و لديك ثقه قوية فى نفسك
و هذا هو أهم شرط ..أما الباقى فسهل الحصول عليه و اكتسابه
بالقراءة أو مشاهدة شرائط لمدربين شهيرين ..و فى النهاية
الممارسة هى التى تصنع منك مدربا ناجحا
فى ظل وجود الأفراد الذين يروجون لك و يصفون للناس براعتك
و لا بأس من وجود شهادة معتمدة من أى مكان
======
و هو تجارة مربحة جدا جدا خصوصا لمدربى التنمية البشرية المصريين
الذين يكتفون بدرجة معينة من العلم والمهارات يقفون عندها
فلا تجد عندهم جديدا و تكون كل ندواتهم ومحاضراتهم مكرره
ما قالوه منذ عامين هو ما قالوه اليوم وما سيقولونه بعد سنه
فما الداعى إذن لحضورى محاضرته
لماذا لا أكتفى بمشاهده شريط سابق لمحاضرته أو لغيره
أيكون السر فى هذه الشهادة البغيضة التى يضحكون علينا بها؟
__________
اشتريت كتابا لأحد المدربين المشهورين
و قارنته بكتب المشاهير العرب و الأجانب كـ أنتونى روبينز
فو جدت الكتاب خاليا.. كل صفحة بها فقط ما يقرب من خمس سطور
و الباقى خال...و هكذا الى أخر الكتاب
أليس هذا غشا و خداعا و الغرض تجارى دنيء
_ _
و أفتح الكتاب أجد لكى تصبح كذا يجب أن تفعل
رقم واحد...كذا
اثنين ..كذا
ثلاثة.....
أربعة.....
ما هذا هل هو تسميع لشىء حفظه
أين احترام العقل؟
________
اننى حتى الآن لا أتخيل كيف يدفع شخص ما مبلغ 800 جنية
أو حتى 200 فى مثل هذه الدورة و الكلام المكرر
و هل ثلاثة أيام من الاستماع كافية لتغيير حياة شخص ما
و تطويره للأفضل؟
_________
اننى أحاول أن أخرج من ذهنى الصورة التى رسمتها لمدرب التنمية البشرية
فى أول محاضره أحضرها
و هذه الصورة هى أن مدرب التنمية البشريه
هو فقط شخص يرفع من معنوياتك الى عنان السماء
ثم تخرج من عنده لتجد نفسك لا شىء
_______
أنا لست ضد التنمية البشرية كعلم
انما أنا أرى أن ديننا الذى هو مرجعنا
يحتوى على كل أساسيات التنمية البشرية
فلو عدنا اليه لما احتجنا لمدربين و منمين
فمن المفترض أن كل شخص فى موقعه هو منمى بشرى
المدرس و الطبيب و المهندس و...حتى ماسح الأحذية
فديننا يأمرنا بالأمر بالمعروف و نهى الأخرين عن المنكر
و ديننا النصيحة لله ورسوله ولللمؤمنين
و اننى أتساءل
لماذا مات ديل كارنيجى منتحرا
ذلك الرجل الذى يأخذ عنه مدربوا التنمية البشرية أفكاره
و يعلموها لنا...كيف يموت تلك الميته البشعة
ألم يكن منميا بشريا
يشرح للناس كيفيه الوصول الى السعادة
فلماذا لم يسعد بحياته؟؟
هل فاقد الشىء لا يعطيه؟
هل كان يفتقد السعادة والنجاح؟
إذن لماذا يتبعه مدربوا التنمية البشرية؟


ياريت أعرف رأيكو فى مدربى التنمية البشرية

علشان الموضوع ده شاغل بالى بقاله فتره طويلة

ومش عارف اوصل لحل قاطع

جاءنى التاج التالى...

السلام عليكم ورحمه الله وبركاته
وصلنى تاج من الأخ العزيز
الجميل mohamed ghalia

ودا أول تاج يجيلى

أنا بأشكره عليه جدا

حأجاوب على أسئلته اللى بصراحه صعبة شوية

السؤال الأول:ماهى السعادة من وجهة نظرك؟
انا شايف ان السعادة بتتمثل فى حاجتين
الرضا ومحاولة اسعاد الأخرين
الرضا بمفهومه الشامل
الرضا عن نفسك,أصحابك,أهلك, عملك
و مش معنى الرضا عدم الثورة على الظلم
لأ بس ما تقحمش نفسك فى غيابات الهم

السؤال الثانى: كيف تصل إلى السعادة؟
بطاعه الله تعالى
اتباع أوامره واجتناب نواهيه
و مفيش طريق للسعادة غير كده
السؤال الثالث: هل السعادة وهم أم أنها حلم صعب؟
هى مش كده ولا كده
هو انتا فى حياتك كلها..عمرك ما حسيت انك سعيد؟؟
لا طبعا
بس هى نسبيه و مدتها مش بتطول
لأننا بنصطدم بالواقع المؤلم
اللى أقصده انها موجوده و مش صعبه
بس استمرارها صعب
خصوصا ان حوالينا ناس مش بتحب تشوف حد سعيد
لازم تعكنن عليك بأى طريقه
السؤال الرابع: هل السعادة طريق للنجاح ؟وضح؟
لو كنت تقصد التفاؤل واشراقة النفس...يبقى الاجابه نعم
لأنه بتدفع صاحبها للتغلب على العقبات بسهوله
و بتفتح له أبواب الأمل
لوكنت تقصد غير كده يبقى بصراحه دى بلاهه
السؤال الخامس: ماهى أكثر اللحظات التى شعرت فيها بالسعادة؟
أكتر واحده مش فاكرها
بس ممكن أقولك على أخر مره
كانت امبارح ..كنا بنجيب شبكه خطيبه أخويا
عقبال عندك
كنت سعيد جدا
السؤال السادس:هل ممكن أن تحقق كل شىء؟
دى حاجه مش فى ايدى
دى حاجه بأيد ربنا
و اللى ربنا كاتبه ليا حيكون

السؤال السابع: السعادة تجعلك تقبل على الحياة أم لا؟
طبعا... لو كانت سعادة هادفه
سعادة متبادلة
انما غير كده ..ما اعتقدش
ما المدمن بيبقى سعيد ..وبعدين؟؟
و علشان يبقى سعيد ..بيقتل ويسرق
دى مش سعادة
السؤال الثامن: هل أحسست يوما انك وصلت لقمة السعادة؟
و الله أنا شايف ان دى حاجه نسبيه
يعنى قمة السعادة عندك تختلف عن قمة السعادة عند واحد تانى
و ممكن اللى انتا كنت بتحسبها قمة السعادة
تفرح وتسعد بشكل اكبر منها بعدها
بصراحه انا معرفش قمة السعادة دى عاملة ازاى
علشان كده ما اقدرش أجاوبك وأديك رأيى فى حاجه ما أعرفهاش

السؤال التاسع: لماذا تمر أوقات السعادة بسرعة؟
علشان هى دى سنه الحياة
حبه فوق وحبه تحت
و علشان الناس اللى حواليك
لازم تلاقى فيهم حد يفسد عليك فرحتك
يا اما غيرة يا اما هو كده أصلا
وفى الأخر كله بأمر الله
السؤال العاشر: هل ترى السعادة فى التدين؟
أيوه ..أوف كوبس ..أبسولوتلى
السؤال الحادى عشر: هل أنت متفاؤل وعندك أمل؟ وضح؟
سعات سعات.. بحب عمرى و أعشق الحاجات
اسمع أغنيه صباح حتلاقيها بتوصفنى
السؤال الثانى عشر: إذا شعرت بالحزن ماذا تفعل؟
بأتفرج عالتليفزيون
بأسمع قرآن
مش بأقعد لوحدى
بصلى و أدعى
السؤال الثالث عشر: هل يستمر معك الحزن فترة ام ينقضى فى الحال؟
على حسب السبب
بس ينقضى فى الحال دى مش بتحصل أوى
يعنى ممكن أقول لنفسى انا مش زعلان
بس بلاقى نفسى زعلان
السؤال الرابع عشر: ما رأيك فى الأفراد المتشائمين؟
بوررريه منهم بوررريه
مش كويسين خالص
اتجنبهم احسن
الواحد مش ناقص غم
علشان كده المتشأئم متلاقيش أصحابه كتير
و المتفائل الكل ملموم حواليه

هيه ..خلصت أخيرا

ناقص أكتب اسمى ورقم الجلوس بقى

هههههه

حيرة النسيان

ماذا أصابني؟
لست أنا الذي أعرفه من سنين
ماذا حصل؟
أين إشراقه النفس؟ أيـن الأمل
تلاشت ثقتي بنفسي حتى انمحت
فــــمن أنا؟؟ ومن أكون؟
أين ذاكرتى القوية؟ أأضعفتها الشجون؟
كنت أظنني لا أنسى اسما
و أن شكل الأشخاص فى عقلي مرسوم
فاليوم ..مالــ عقلى ينسى كل شىء
كل شيء الا حبي
ينسى النقود أين وضعتها و المفاتيح والكتب
ينسى أسماء الأشياء وكل اسم
هل يأتي يوما ينسى اسمي؟
هل يأتي يوما أنسي نفسي؟
و لماذا أنسى يا ترى؟
هيا اخبروني؟
حتى ذكرياتي الجميلة في الطفولة...نسيتها
و يل لــها
ويل لكل من كان السبب
وويل لنفسي إن كنت سبب عذابها
يــا ويلها
أأكون أنا أضعفت نفسي وهدمتها؟
أأكون في غابات الهموم قد أقحمتها؟
أم أننى أنسى لأني خلقت انسانا
ومن النسيان بدأت والى النسيان عودتى؟
انجدوني و خبروني لماذا أنسى؟
ففي ظلام الحشا داخلي بين الضلوع
ينبت شعور قاتل مريـر
يأخذني ويلقيني بين أنياب السباع
هل أنا مازلت حيا؟
أم أعلنت مولد سنوات الضياع؟


معلومة صوغنونه:
فى دراسة تم إجراؤها في انجلترا
تم التوصل إلى أن المتابعة الدورية للرسائل بغرض الرد عليها
كما في بعض أنواع الوظائف و متابعي المنتديات والمدونات
يؤدى إلى النسيـــــــــــــان بطريقة ملحوظة
خدوا بالكوا علشان ما تبقوش زيى كده

حبيبتى عادت

التقت عينانا من جديــد
و انتشى القلب البارد الجليد
و تيقظ المارد داخلى
يحتفل
نخب عوده الحب الفقيد
و ألفيت كيوبــيد السهام باسما
ينظر اليا من طرف بعيد
فأشرت اليه تعال
اقترب
لأعطيك جرعة حب بالوريد
فتقوى وتضرب سهام المشاعر
تلين بها كل قلب بليد
فقلبى يرقص طربا حينمــا
أرى الكل من حولى سعيــد

تنبيه لابد منه:
مفيش حاجه اسمها كيوبيد
و كل شىء بتدبير الله فقط

أحبك باللون الأحمر

احبك باللون الأحمر

أحاسيس ومشاعر تظهر

نبع من قلبى ووجدانى

تتجول فى دمى القانى

تتدفق عبر شرايينى

وتسقى اليبس ف أوصالى

وتمحو اليأس من نفسى

وتهدم جسر أحزانى

وتحيل الشيب بانسجتى

ل أخضر يملأ الوادى

وعليا تفيضى بحنانك

ل تحييى العشق ببستانى

ف أهديك من حقلى زهره

حمراء بديعه المنظر

و بشفتاى الحمرا أقبلكى

فأذوق الاحلى من السكر

لاثبت صدقى ان قلت

احبك باللون الأحمر

ف وأنتى بجانبى يا أمى

اشتاق اليكى اكثر وأكثر